"حين يتحول حب التوجيه إلى قيد يهدم المجتمع""" تفتكر هتبقى ايه النتيجة ؟؛
كتبت: ياسمينا شاهين تكتب
بنقعد أحياناً نتأمل في تفاصيل حياتنا وعلاقاتنا باللي حوالينا، ونلاحظ حاجة غريبة بتتكرر؛ فيه ناس شايفة إن السعادة والنجاح مبيحصلوش إلا لو كل الأمور مشت تحت إمرتهم وبناءً على خططهم الشخصية. الشخص ده مش بس بيدير حياته، ده بيمتد بنفوذه عشان يسيطر بنفسه على قرارات وأفكار وحتى مشاعر كل اللي حواليه،
و خاصة لو رأيه غلط !!
والحالة دي مش مجرد حرص زايد، دي ظاهرة أعمق بكتير نقدر نسميها بـ "داء السيطرة".
الناس بتتلخبط ساعات بين القيادة والسيطرة؛ القائد الحقيقي هو اللي بيفتح للناس طاقة نور، بيسمع، بيشجع، وبيديهم مساحة يغلطوا ويتعلموا ويحطوا بصمتهم، لكن الشخص المسيطر بيبص للناس كأنهم قطع شطرنج المفروض يحركهم بالمزاج، وبيخنق الإبداع جوه اللي حواليه لمجرد إنه عاوز يحس إنه مصدر الأمان والحل الوحيد،
و مبيقدرش يفصل بين التكاملية و حرية الابداع و بين التقييد و حب الظهور وسر الكارثة دي غالباً بيكون خوف خفي أو شعور بالنقص بيحاول يداريه بفرض رأيه بالقوة.
والحقيقة إن الداء ده ملوش مكان محدد، بل بيتسرب لكل حتة في حياتنا؛ بنشوفه في بعض البيوت الي لم تنشأ على التفاهم و الود و أدى ده لاهتزاز الثقة بالنفس.
وبنشوفه كمان في الشغل والمؤسسات، لما الموظف أو المدير المسيطر يتحول لمقبرة ابتكار مبيتقبلش أي فكرة بره الصندوق، ولو حد حب يشارك برأي مختلف بيعتبرها قلة أدب أو تحدي لسلطته، فتكون النتيجة شغل ميت وناس بتشتغل بالخوف مش بالحب، وفي الآخر المؤسسة كلها بتنهار من جوه. ده غير أثره في الشارع والمجتمع الواسع، لما بتختفي ثقافة الاختلاف وقبول التنوع، ويبدأ كل طرف يفرض رؤيته على التاني غصب، فتتحول العلاقات الإنسانية لمعارك صامتة، والناس بتبعد عن بعضها عشان تخلص من الإرهاق النفسي.
في النهاية، السيطرة وهم وإحساس كداب بيدي صاحبه شعور مؤقت بالقوة وإنه متحكم في الأمور، بينما في الواقع هو ساجن نفسه في قفص من التوتر لأنه بيكتشف كل يوم إنه مستحيل يتحكم في كل الكون، والتربية اللي بتربط الاحترام بالخوف بتطلع لنا ناس فاكرة إن الحب معناه إلغاء الطرف التاني.
و من ثم علاقات كلها قلق و توتر و نرجسية
عشان كده، العلاج بيبدأ من خطوة جريئة وهي الاعتراف؛ لازم نعرف إن قوة الشخصية الحقيقية بتبان في قدرتنا على إدارة نفسنا مش في السيطرة على غيرنا، ولما نتحرر من وهم التحكم وندرك إن جمال الحياة في تنوعها واختلاف آرائها، هنقدر نبني علاقات صحية.
فالمجتمع السليم مش جدار إسمنتي صامت، المجتمع السليم عامل زي الحديقة الكبيرة، كل وردة فيها ليها لونها وشكلها الخاص، ومع بعض بيعملوا اللوحة الجميلة دي.. حرروا أنفسكم من قيود السيطرة، وسيبوا للناس مساحة تتنفس وتعيش.
و اشوفكو الجمعه الجاية ..
yasminashaheen16@gmail.com
ما هو رد فعل؟



